ಇಂದು ತೆರೆ ಕಂಡಿದೆ ‘ಗಣಿ’ಯ ಸಖತ್ ಮತ್ತು ಹೊಸಬರ ‘ಗೋರಿ’ ಸಿನಿಮಾ!

ಸ್ಯಾಂಡಲ್ ವುಡ್ ಅಂಗಳದಲ್ಲಿ ಇಂದು ಹಬ್ಬದ ಛಾಯೆ, ಶುಕ್ರವಾರ ಬಂತೆಂದರೆ ಒಂದಲ್ಲಾ ಒಂದು ಸಿನಿಮಾಗಳು ಗಾಂಧಿನಗರದಲ್ಲಿ ತೆರೆಗೆ ಬರುತ್ತವೆ. ಇದೇ ಮೊದಲ ಬಾರಿಗೆ ನಟ ಗಣೇಶ್ ಅವರು ‘ಸಖತ್​’ ಸಿನಿಮಾದಲ್ಲಿ ಅಂಧನ ಪಾತ್ರ ಮಾಡಿದ್ದಾರೆ. ಸಿಂಪಲ್​ ಸುನಿ ನಿರ್ದೇಶನ ಮಾಡಿರುವ ಈ ಚಿತ್ರ ಇಂದು (ನ.26) ರಾಜ್ಯಾದ್ಯಂತ ಬಿಡುಗಡೆ ಆಗಿದೆ. ಗಣೇಶ್​ಗೆ ನಾಯಕಿಯರಾಗಿ ನಿಶ್ವಿಕಾ ನಾಯ್ಡು ಮತ್ತು ಸುರಭಿ ಪುರಾಣಿಕ್​ ನಟಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಜೂಡಾ ಸ್ಯಾಂಡಿ ಸಂಗೀತ ನೀಡಿದ್ದಾರೆ. ಕಾಮಿಡಿ ನಟರಾದ ಸಾಧುಕೋಕಿಲ, ಧರ್ಮಣ್ಣ, ಕುರಿ ಪ್ರತಾಪ್​ ಕೂಡ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಇತ್ತೀಚೆಗೆ ಚಂದನವನದಲ್ಲಿ ಹೊಸಬರ ತಂಡ ತಮ್ಮ ಅದೃಷ್ಟ ಪರೀಕ್ಷಗೆ ಹೆಚ್ಚಾಗಿಯೆ ಇಳಿದಂತಿದೆ, ಇಂದು (ನವೆಂಬರ್ 26) ತೆರೆ ಕಂಡಿರುವ ‘ಗೋರಿ’ ಸಿನಿಮಾ ಕೂಡ ಹೊಸ ಪ್ರತಿಭೆಗಳು ಸೇರಿ ತಯಾರಿಸಿರುವ ಚಿತ್ರ.‘ಸಖತ್​’ ಸಿನಿಮಾ ಜೊತೆಯಲ್ಲೇ ತೆರೆಕಂಡಿರುವ ‘ಗೋರಿ’ ಚಿತ್ರಕ್ಕೆ ಉತ್ತರ ಕರ್ನಾಟಕ ಮೂಲದ ಕಿರಣ್​ ಹಾವೇರಿ ಹೀರೋ. ಹಲವು ವರ್ಷಗಳ ಕಾಲ ಸಿನಿಮಾ ಪತ್ರಕರ್ತನಾಗಿ ಕೆಲಸ ಮಾಡಿ ಅನುಭವ ಹೊಂದಿರುವ ಅವರು ಈ ಚಿತ್ರದ ಮೂಲಕ ಮೊದಲ ಬಾರಿಗೆ ಹೀರೋ ಆಗಿದ್ದಾರೆ. ಅವರಿಗೆ ಜೋಡಿಯಾಗಿ ಸ್ಮಿತಾ ಹಾವೇರಿ ನಟಿಸಿದ್ದಾರೆ. ಸ್ನೇಹಿತರೆಲ್ಲ ಜೊತೆಗೂಡಿ ‘ಗೋರಿ’ ಚಿತ್ರವನ್ನು ಬಿಡುಗಡೆ ಮಾಡಿದ್ದಾರೆ. ಬೆಂಗಳೂರಿನ ವೀರೇಶ್​, ಶಾರದಾ ಚಿತ್ರಮಂದಿರಗಳು ಮಾತ್ರವಲ್ಲದೇ, ಉತ್ತರ ಕರ್ನಾಟಕದ ಹಲವೆಡೆ ಈ ಸಿನಿಮಾ ರಿಲೀಸ್​ ಆಗಿದೆ. ಹಾಡುಗಳ ಮೂಲಕ ಈಗಾಗಲೇ ‘ಗೋರಿ’ ಚಿತ್ರ ಗಮನ ಸೆಳೆದಿದೆ.

‘ಗೋರಿ’ ಸಿನಿಮಾದ ನಾಯಕ ಕಿರಣ್​ ಅವರಿಗೆ ‘ಗೋಲ್ಡನ್​ ಸ್ಟಾರ್​’ ಗಣೇಶ್​ ಅವರೇ ಸ್ಫೂರ್ತಿ. ಈಗ ತಮ್ಮ ನೆಚ್ಚಿನ ಹೀರೋ ಸಿನಿಮಾದ ಜೊತೆಯಲ್ಲೇ ತಮ್ಮ ಸಿನಿಮಾ ಕೂಡ ಬಿಡುಗಡೆ ಆಗುತ್ತಿರುವುದು ಅವರಿಗೆ ಇನ್ನಷ್ಟು ಖುಷಿ ನೀಡಿರುವ ಸಂಗತಿ. ಚಿತ್ರರಂಗದ ಹಲವರು ಕಿರಣ್​ ಹಾವೇರಿ ಮತ್ತು ತಂಡದ ಪ್ರಯತ್ನಕ್ಕೆ ಬೆನ್ನುತಟ್ಟಿ, ಶುಭಾಶಯ ಕೋರಿದ್ದಾರೆ.

****